തോന്നൽ

കഥയിലേക്കും കവിതയിലേക്കുമെല്ലാം എളുപ്പവഴികളുണ്ട്
വളരെയേറെപ്പേർ അവയിലൂടെ പോവുന്നുമുണ്ട്
കൊടുമുടി കയറുന്ന ക്ലേശത്തോടെ നാലഞ്ചുവരികളെഴുതി
ഇനി മുന്നോട്ടുപോവണോ എന്ന് അറച്ചറച്ചു നിൽക്കുന്നവരും ഉണ്ട്
കവിതയെ കുറിച്ചും ജീവിതത്തെ കുറിച്ചും
അവർക്കു പറയാനുള്ളത് കേൾക്കാൻ 
എന്നും തിടുക്കപ്പെടാറുണ്ട്‌
അത്തരക്കാർ വലിയ കവികളായിരിക്കുമെന്ന പ്രതീക്ഷ കൊണ്ടല്ല
അവരുടെ കഴിവുകേടും ആത്മസംശയങ്ങളും
കൂടുതൽ സത്യമായേക്കും എന്ന തോന്നൽ കൊണ്ട്.
19/4/2015